Қазақстанда студенттердің шәкіртақысы өседі

Ғылым және жоғары білім министрі Саясат Нұрбек жаңа оқу жылымен құттықтады. Ол өз сөзінде бүгіннен бастап, шәкіртақы өсетінін айтты. Бұл туралы Bugin.kz порталы министрліктің ресми парақшасына сілтеп хабарлайды.

«Құрметті оқушылар, студенттер, ұстаздар, оқытушылар және ата-аналар! Қымбатты менің әріптестерім! Баршаңызды 2022-2023 оқу жылының басталуымен құттықтаймын! Жаңа оқу жылы мектеп табалдырығын енді аттағалы тұрған 1-сынып оқушылары мен жоғары оқу орындарына арман қуып келген 1-курс студенттері үшін сәтті өтсін! Cіздерді жарқын болашақ, биік белестер күтіп тұр. Сабақтарыңызды жақсы оқып, ғылым, спорт және шығармашылық салаларында мол табыстарға кенеле беріңіздер. Айта кетейін, Ғылым және жоғары білім министрлігінің жаңа оқу жылына жоспары көп. Оларды жүзеге асыру жұмыстары басталып кетті. Естеріңізге сала кетсем, бүгіннен бастап Мемлекет басшысының тапсырмасы бойынша жоғары оқу орындары студенттерінің шәкіртақысы 20 пайызға, магистранттар мен докторанттардың шәкіртақысы 15 пайызға өседі. Біздің ұжым сапалы білім мен дұрыс кәсіби бағдар үшін аянбай еңбек етуге дайын. Оқуда озат, еңбекте адал болыңыздар. Биік шыңдарды бірге бағындырайық!» - деді министр.