Петропавлда 21 жастағы қызметкер жұмыс орнында қаза тапты

Петропавлда жылу электр орталығының қызметкері өндіріс орнында жарақат алып, қаза болды, деп хабарлайды Bugin.kz порталы Рolisia.kz сайтына сілтеме жасап.

Петропавл қаласы Полиция басқармасының бірінші полиция бөлімінің өндірісінде ҚР ҚК-нің 156-бабының 2-бөлігі бойынша сотқа дейінгі тергеу материалдары бар.

«Сотқа дейінгі тергеу барысында 5 қараша күні Петропавл 2-ЖЭО аумағында жұмыс орнында болған 21 жастағы монолитшінің өндірістік жарақат алғаны анықталды. Ер адам медициналық мекемеге жатқызылды. Ол 7 қараша күні алған жарақаттарынан қайтыс болды» делінген хабарламада.

Сайт мәліметінше, сол күні аталған қылмыстық іс ҚР ҚК-нің 156-бабының 3-бөлігіне қайта сараланды. Ал қазіргі уақытта істің мән-жайларын зерттеуге бағытталған тергеу әрекеттері жүргізілуде, олардың нәтижелері бойынша түпкілікті процестік шешім қабылданады.

Сондай-ақ хабарламада жұмыстарды орындау кезінде өндірістік қауіпсіздік талаптарын сақтау бойынша жауапты тұлғалардың кінәсі айқындалатыны айтылған.