Алматыда машина құрастырылады: Қандай көліктер елімізде шығады?

Алматыда Changan, Chery, Haval маркалы автомобильдер шығаратын зауыттың іргетасы қаланды, деп хабарлайды Bugin.kz порталы Ақорданың баспасөз қызметіні сілтеме жасап.

Мемлекет басшысы Қасым-Жомарт Тоқаев мультибрендті, яғни Changan, Chery, Haval сынды түрлі маркалы автомобильді шығаратын зауыттың іргетасын қалау рәсіміне қатысты. Президентке жобаның төлқұжаты таныстырылып, 2024 жылдың төртінші тоқсанында ашылады деп жоспарланған зауыттың үлгісі көрсетілді.

Зауыттың өндіріс аумағы 100 мың шаршы метрден асады. Үш автокөлік маркасының әрқайсысы үшін дәнекерлеу және құрастыру жұмыстарына арналған жеке цех салынады.

Зауыт іске қосылғаннан кейін оның өндірістік қуаты жылына 90 мыңнан астам көлік шығаруға жетеді. Инвестицияның жалпы құны 100 миллиард теңгеден асады. «Astana Motors» компаниясы 2200-ге жуық жұмыс орнын ашады.