Алматы облысында 10 жыл құжатсыз өмір сүрген тұрғын жан сырын бөлісті

Алматы облысы Түрген ауылының 65 жастағы тұрғыны 10 жыл бойы құжатсыз, зейнетақысыз өмір сүріп жатыр. Бұл туралы bugin.kz тілшісі Almaty.tv сайтына сілтеме жасап хабарлайды.

Болат Құлатаев 9 жылдан бері туу туралы куәлігі мен жеке куәлігін қалпына келтіре алмай жүр. Ол үйінде болған өрт кезінде бәрінен айырылған. Мұрағатта оның жеке басын растайтын деректер жоқ.

Үш жыл бұрын Болат Құлатаев зейнет жасына жетті. Бірақ ер адам жинаған ақшасынан бір тиын да алмаған. Мұның бәрі - 2014 жылы болған өрттің кесірінен уәкілетті органдарға құжаттарын ұсына алмағандықтан. Ол кезде үй иесі пешті жағып, жұмысқа кеткен. Өртті көршілер байқаған. Бірақ сол оқиғаның салдары жылдар өткен соң үлкен мәселеге әкелді. Өртенген қағаздар, оның ішінде кеңестік төлқұжат он жылға жуық уақыт бойы қалпына келтірілмеген. Осы жылдар бойы Болат Құлатаев еш жерде тізімде жоқ. Құмға сіңген судай мемлекеттік органдардың деректерінде, цифрлы құжаттарда аты жоғалған.

"Кешкі мектепте оқып, Талғардағы техникумды бітірдім. Сертификат алдым. Барлық қағаздар өртеніп кетті. Мен Кеңес өкіметі кезінде, төлқұжатымды соңғы рет 45 жасымда жаңарттым. Мен құжаттарды қалпына келтіруге қанша рет әрекет жасадым? Тек проблемаға душар келіп жатырмын", - дейді ауыл тұрғыны Болат Құлатаев.

Ол ұзақ жылдар бойы тракторшы болып жұмыс істейді. Ол бұл кәсіппен күні бүгінге дейін күн көріп жүр. Бұрынғыдай жұмыс істеп, үй шаруасымен айналысуы қиын. Жасының ұлғайғаны оның жұмыс істеу мүмкіндігіне әсер етіп жатыр. Қарттың туыстарының барлығы Астанада тұрады. Болат Құлатаевқа көршілері көмектесіп жүр.

"Колхозда табан аудармастан 22 жыл еңбек еткен ол қазір жұмысқа жарамсыз", - деді көршісі Әлібек Баяуов.

Мәселені аудан әкімдігі біледі. Бірақ мамандар ауыл тұрғынының құжаттарын қалпына келтіруге, одан кейін зейнетақыны есептеуге әлі де қол жеткізе алмай отыр. Ер адам ешбір дерекқорда немесе ешбір ресурста жоқ.

"Барлық процесс туу туралы куәлікке қатысты мәселеге байланысты кешіктіріліп жатыр. Бірыңғай базада оның қайтыс болған ағасы ғана бар. Болат Құлатаевтың өзінің өмірлік жазбалары еш жерде жоқ. Мұрағатқа да қарадық – нәтиже жоқ. Біз бұл мәселеде бей-жай қалмаймыз. Біз заңгерлер мен басқа да мамандардың көмегіне жүгінеміз. Бұдан шығатын жол болуы керек", - деп атап өтті Түрген ауылдық округі әкімі аппаратының бас маманы Айгүл Шайбекова.

Қария алғашқы зейнетақысына үйін күрделі жөндеуден өткізуді армандайды. Қазіргі таңда құжатының реттелгенін күтіп жүр.