"Борышымды өтеуім керек": тағы да бір сарбаз мерт болды

Жетісу өңірінде 21 желтоқсанда әскер қатарындағы Әмір Байтұрғанов қайтыс болды. Бұл туралы Bugin.kz тілшісі Orda.kz сайтына сілтеме жасап хабарлайды.

Марқұм сарбаздың әкесі Мұрат Байтұрғановтың айтуынша, әскери бөлім оның ұлының өліміне менингит себеп деп атайды. Бірақ әкесі Әмір дер кезінде емделмеген бүйрек ауруынан қайтыс болды деп есептейді.

Әкесінің айтуынша, оның 18 жастағы ұлы Астанадан биыл 12 қазанда әскер қатарына шақырылған. Ол Жаркент қаласындағы 7462 әскери бөлімінде мотоатқыштар бөліміне жіберілген. Марқұм өз еркімен әскерге барғысы келген.

"Қорғаныс министрлігінен курстардан өтіп, жүргізуші мамандығы бойынша әскери біліктілік алды. Ол еліне қызмет еткісі келді. Ол үнемі: "Мен ер адаммын, борышымды өтеуім керек. Мен бір жыл қызмет етемін, бәрібір" дейтін", - дейді сарбаздың әкесі.

18 қарашада Әмір ант қабылдаған. Мұраттың айтуынша, ол бір бүйрегі ауырғанына шағымданған. Ал кейінірек ата-анасына хабарласқанда, екі бүйрегі де ауырып тұрғанын айтқан екен.

"Әскерде оны ешкім ұрған жоқ. Мен бұл туралы анық айта аламын. Балам спортшы еді. Бұл – жоқ жерден келген ауру ", – дейді әке.

Оның айтуынша, Әмір бөлімше дәрігерлеріне 28 қарашада шағымданған. Бірақ тек 6 желтоқсанда ғана УЗИ-ге түскен. Зерттеудің сипаттамасында сарбаздың созылмалы екі жақты пиелонефритпен ауырғаны көрсетілген.

"УДЗ-дан кейін медициналық бөлімге жатқызылады. Бірақ оған дәріні өзіміз сатып алдық. Менің білуімше, мұндай аурумен оған 10 күн бойы антибиотиктер енгізу керек еді. Бірақ ондай ештеңе болған жоқ", - дейді Мұрат Байтұрғанов.

Сарбаздың әкесінің айтуынша, бірнеше күннен кейін бөлімшеге тексеру келгендіктен, медициналық бөлімдегі науқастарды тиісті орындарға жіберген.

"Оларға тексеріс кеткен бойда барлығы қайта емделетінін айтқан. Бірақ жауапты қызметкерлер ұлыма емделуге мүмкіндік бермеген. Ұлымды моншаға апарып, одан полигонға жіберген. Ал олардың жаттығу алаңы суық. 20 желтоқсанда ауырып, дене қызуы көтеріліп, азаматтық ауруханаға жеткізілген. Неліктен ұлымды әскери госпитальға жібермегенін білмеймін", - дейді әкесі.

Мұраттың айтуынша, содан соң ұлының жағдайы нашарлаған. Есін жоғалтып, комаға түсіп, 21 желтоқсанда сағат 6:20-да қайтыс болған.

Әмір Байтұрғановтың өлімі туралы куәлікте өлімнің себебі ретінде менингококкты менингит көрсетілген. Дегенмен сарбаздың әкесі бұл нұсқаға сенбейді.

"Бізге оның бөлімшеден тыс жұқтырған менингит екенін айтты. Бірақ менингит – жұқпалы ауру. Сонда неге олардың бөлімшесінде менің баламнан басқа ешкім ауырмады? Неліктен карантин ол қайтыс болғаннан кейін ғана жарияланды?", - деп сұрайды Мұрат Байтұрғанов.

Мұраттың өзі ұлының ауруына байланысты ем ала алмағаны өліміне себепкер болған деп есептейді.

Orda.kz сайты Қорғаныс министрлігі өкілдерінен 74621 әскери бөлімінің Әмір Байтұрғановтың қазасына қатысты жағдайға түсініктеме беруді сұрады. Әскери бөлім әлі ресми жауап қайтарған жоқ.