Президент көмекшісі Қанат Шарлапаев “Бәйтерек” холдингінің директорлар кеңесіне қайта енді

Президенттің экономикалық көмекшісі Қанат Шарлапаев “Бәйтерек” ұлттық басқарушы холдингінің директорлар кеңесінің құрамына сайланды, деп хабарлайды Bugin.kz порталы. 

Холдингтің директорлар кеңесінде барлығы 10 мүше бар. Жаңартылған құрамға Премьер-министр Олжас Бектенов, оның бірінші орынбасары Роман Скляр, Сауда және интеграция министрі Серік Жұманғарин, Стратегиялық жоспарлау және реформалар агенттігінің төрағасы Мәди Тақиев, қаржы-экономика саласының өкілдері Ерсайын Нағаспаев пен Рустам Қарайғошин және шетелдік тәуелсіз директорлар — Мари-Хелен Берард, Даниэль Алан Витт пен Норберт Манфред Грундке кірді.

Айта кетейік, Қанат Шарлапаев бұған дейін де — 2022-2023 жылдары “Бәйтерек” холдингінің басқарма төрағасы болып тұрған кезде директорлар кеңесінің мүшесі болған.

2025 жылы ол Мемлекет басшысының экономикалық мәселелер жөніндегі көмекшісі қызметіне тағайындалған еді.