Қазақстанда балаларға арналған арнайы SIM-карта пайда болды

Алматыда балаларды интернеттегі зиянды контенттен қорғауға бағытталған жаңа жоба – SIM KIDS ресми түрде іске қосылды, деп хабарлайды Bugin.kz порталы. 

Бұл бастама Бас Прокурордың тапсырмасымен 2023–2025 жылдарға арналған кешенді жоспар аясында жүзеге асып отыр. Жоспардың мақсаты – балаларға қатысты зорлық-зомбылықтың алдын алу, олардың қауіпсіздігі мен құқықтарын қорғау.

Алматы қаласының прокуратурасы TELE2/ALTEL байланыс операторымен бірлесе отырып, SIM KIDS пилоттық жобасын әзірледі. Бұл SIM-карта балалар үшін арнайы бейімделген:

• зиянды контентті автоматты түрде бұғаттайды,
• ата-аналарға баланың қолданбалардағы белсенділігін бақылауға мүмкіндік береді,
• телефон дыбыссыз режимде болса да, ата-аналар баламен үнемі байланыста бола алады.

Пилоттық кезең сәтті аяқталып, жоба бүгінде барлық ата-ана үшін қолжетімді.