Шерзат Болат ісі: сегіз сотталушыға апелляциялық сот бойынша үкім шықты

18 тамызда кәмелетке толмаған Шерзат Болаттың қазасына байланысты қозғалған қылмыстық іс бойынша сегіз сотталушының апелляциялық шағымы қаралды. Олар бірінші сатыдағы соттың шешіміне наразылық білдірген еді, деп хабарлайды Bugin.kz порталы. 

Бүгін апелляциялық алқа тараптардың уәжін тыңдап, бастапқы үкімді өзгеріссіз қалдыру туралы қаулы шығарды.

Қайғылы оқиғаға шолу

Былтыр Талғар ауданында жаппай төбелес орын алып, салдарынан 16 жастағы Шерзат Болат көз жұмды. Оқиға бойынша Алматы облыстық Полиция департаменті кісі өлтіру дерегімен қылмыстық іс қозғаған. Кейін марқұмның отбасы бірқатар ауыр сынаққа тап болды: олардың үйі өртке оранды, ал араға көп уақыт салмай, 9 желтоқсанда Шерзаттың ағасы Нұрғанат Ғайыпбаев қайтыс болды. Тергеу органдары оның өлімін суицид деп бағалады. 

Сот шешімі

Тергеу мәліметіне сәйкес, Шерзатқа пышақ жарақатын салған негізгі айыпталушы Абзал Шынасыл 23 жылға бас бостандығынан айырылды. Тағы бір сотталушы, Равиль Сакиев, 20 жылға жаза алды. Қалғандарына 7 жылдан 15 жылға дейінгі мерзім тағайындалды. Кәмелетке толмаған Ы.Д. 1,5 жылға сотталды.