Кәрім Мәсімовтің қызы бұрынғы күйеуіне қарсы сотта жеңілді

ҰҚК-нің бұрынғы төрағасы Кәрім Мәсімовтің қызы Тамилла Кәрім экс-күйеуі Азамат Қапеновке қарсы қозғалған сот процесінде жеңілді, деп хабарлайды Bugin.kz порталы.

Тамилла Кәрім мен Азамат Қапенов 2013 жылдан 2019 жылға дейін ресми некеде болған. Екеуі де Ресей Федерациясының азаматтары. 2023 жылы Тамилла Кәрім бұрынғы жұбайымен бірге жинаған мүлікті бөлу туралы сотқа талап арыз берген.

Алайда сот материалдарына сәйкес, тараптар 2020 жылы ортақ мүлікті бөлу туралы келісімге келген. Келісім бойынша, Азамат Қапеновтің меншігінде Мәскеудің элиталық аудандарының бірі Хорошевское Серебряный Борда орналасқан 1200 шаршы метрлік ғимарат пен оған тиесілі 2900 шаршы метр жер телімі қалған. Бұл нысандардың кадастрлық құны қазіргі бағаммен 750 миллион теңгеден асады.

Сот деректерінде көрсетілгендей, бұл екі тараптың келісімімен бес ай бойы талқыланып, өзара мақұлданған. Соған қарамастан, 2023 жылы Тамилла Кәрім келісімді қайта қарауды сұрап, сотқа жүгінген. Алайда дәл осы кезде даулы мүлік Қапенов тарапынан үшінші тұлға Чолпон Шейшекееваға сатылған.

Мәскеудің Мещан аудандық соты талапкердің уәжін негізсіз деп танып, мүлікті бөлу туралы келісімді заңды деп тапты. Тамилла Кәрім бұл шешімге апелляциялық шағым түсірді, алайда құжаттар толық ұсынылмағандықтан, шағым 2025 жылдың 26 қыркүйегіне дейін қараусыз қалдырылды.

Айта кетейік, 2024 жылы Азамат Қапенов алдымен Ресейде, кейін Қазақстанда іздеу жарияланған тұлғалар тізіміне енді. Қазақстанда ол алаяқтық фактісі бойынша күдікке ілініп, сот оны сырттай қамауға алуға шешім шығарған. Сол жылдың соңында оның бауыры Медер Қапенов те Ресейде іздеуде жүргені белгілі болды. Екі ағайынды да Қырғызстан тумасы, алайда Ресей тарапы олардың нақты қандай қылмысқа күдікті екенін әлі ресми мәлімдеген жоқ.

Еске салсақ, Карим Мәсімов 2023 жылдың сәуірінде мемлекетке опасыздық жасау, билікті күшпен басып алуға әрекеттену және қызметтік өкілеттікті асыра пайдалану баптары бойынша 18 жылға бас бостандығынан айырылған еді.