Ел тарихында саяси-құқықтық бетбұрыс жүзеге асты — Тоқаев

Мемлекет басшысы Қасым-Жомарт Тоқаев елдің саяси жүйесіндегі реформаларды атап өтті, деп хабарлайды Bugin.kz порталы. 

“Еліміздің саяси жүйесінде “Күшті Президент – ықпалды Парламент – есеп беретін Үкімет” қағидаты орнықты. Бұл биліктегі өзара тиімді байланыс пен тепе-теңдікті сақтауға мүмкіндік берді. Президенттің жеті жылға бір рет қана сайлануы ел тарихындағы аса маңызды саяси-құқықтық бетбұрыс деп айтуға толық негіз бар. Себебі мұндай жағдай Қазақстанда бұрын-соңды болған емес”, – деді Мемлекет басшысы.

Президенттің айтуынша, елде мемлекеттік басқарудың жаңа үлгісі қалыптасты, бұл саяси процестердің ашықтығын арттырды.

“Осылайша, елімізде биліктің бірегей үлгісі пайда болды, мемлекеттік басқару жүйесі жаңа қағидаға сай жұмыс істей бастады. Саяси үдерістер әлдеқайда түсінікті, болжамды, айқын бола түсті. Президенттің жақын туыстарына билік жүйесінде лауазымды қызмет атқаруға тыйым салынды. Биліктегі отбасылыққа тосқауыл қойылды. Бұл да өте қажетті қадам болды”, – деді Қасым-Жомарт Тоқаев.

Мемлекет басшысы бұл өзгерістерді халықаралық деңгейде теңдесі жоқ конституциялық жаңашылдық деп атады.

“Халықтың осы шешімі – аса маңызды саяси-құқықтық жаңашылдық, әлемде баламасы жоқ конституциялық инновация”, – деді Президент.