Қазақстандық «Гүлдер» ансамблі Дүниежүзілік көшпенділер ойындарында Гран-при жеңіп алды

Қазақстандық өнерпаздар халықаралық байқауда жоғары деңгейдегі өнерін көрсетті. «Этно-би» сайысында Қазақстанмен қатар Қырғызстан, Түркия, Болгария, Үндістан, Пәкістан және басқа да елдердің кәсіби шығармашылық ұжымдары өнер көрсетті.

«Гүлдер» мемлекеттік ансамблі байқау бағдарламасында «Ер Тұран» және «Қорқыт» композицияларын ұсынды. Қойылымдарда ұлттық бидің ерекшелігі мен қазақ халқының мәдени мұрасы көрініс тапты.

Ансамбльдің сахнадағы үйлесімді қимылы, орындаушылық шеберлігі мен көркемдік шешімі қазылар алқасының жоғары бағасына ие болды.

Байқау қорытындысы бойынша Анвара Садықова мен «Гүлдер» ансамблінің бірлескен шығармашылық жұмысы Гран-приге лайық деп танылды.

Дүниежүзілік көшпенділер ойындары дәстүрлі спорт түрлерімен қатар, көшпелі халықтардың мәдениеті мен өнерін танытуға мүмкіндік беретін ірі халықаралық шаралардың бірі. Nomad Fest фестивалі аясындағы өнер байқаулары түрлі елдердің шығармашылық ұжымдарын бір сахнада тоғыстырды.