Қазақстан экономикалық бәсекеге қабілеттілік рейтингінде ТМД-да бірінші орын алды

Қазақстан халықаралық экономикалық бәсекеге қабілеттілік рейтингінде жоғары нәтиже көрсетті. IMD World Competitiveness 2026 зерттеуінде еліміз 70 мемлекет арасында 38-орынға ие болды.

Қазақстан аталған рейтингке енген ТМД елдерінің арасындағы жалғыз мемлекет болды. Еліміздің жалпы көрсеткіші 65,4 ұпайды құрады.

Зерттеу нәтижесінде Қазақстан бірқатар еуропалық және басқа да мемлекеттерден жоғары нәтиже көрсетті. Атап айтқанда, ел Испания, Португалия, Польша, Италия және Аргентинаны басып озды.

Жекелеген бағыттар бойынша да Қазақстанның көрсеткіштері әртүрлі деңгейде қалыптасты. Мемлекеттік тиімділік пен бизнес тиімділігі бойынша ел 23-орынға, инфрақұрылым бойынша 43-орынға, ал экономикалық көрсеткіштер санатында 57-орынға орналасты.

Жалпы рейтингте Сингапур бірінші орынға шықты. Алғашқы үштікте бұдан бөлек Гонконг пен Швейцария бар.

IMD World Competitiveness рейтингі елдердің экономикалық жағдайын, мемлекеттік басқару тиімділігін, бизнес ортасын және инфрақұрылымын қоса алғанда бірнеше негізгі бағыт бойынша бағалайды.