АҚШ мұнай компаниялары әлемде отын тапшылығы қаупі күшейгенін мәлімдеді

Әлемдік отын нарығындағы жағдай күрделене түсті. АҚШ-тың мұнай компаниялары коммерциялық отын қорларының жарты жылдан астам уақыт бойы азайып келе жатқанын айтып, жаһандық отын дағдарысының қаупіне назар аударды.

Сонымен қатар стратегиялық мұнай қорларын одан әрі пайдалану мүмкіндігі де шектеулі. Бұл нарықтағы ықтимал тапшылықты қысқа мерзімде өтеуді қиындатуы мүмкін.

Жағдайға Сауд Арабиясындағы маңызды мұнай құбырының жұмысын тоқтатуы да әсер еткен. Бұған қоса, АҚШ пен Иран арасындағы қақтығыс салдарынан Ормуз бұғазы арқылы мұнай мен отын тасымалдайтын кемелердің қозғалысы айтарлықтай шектелген.

Ормуз бұғазы – әлемдік мұнай тасымалы үшін маңызды теңіз жолдарының бірі. Сондықтан бұл бағыттағы кез келген іркіліс халықаралық энергетикалық нарыққа әсер етуі мүмкін.

Сарапшылардың пікірінше, Таяу Шығыстағы қақтығыс ұзаққа созылып, мұнай тасымалына қатысты шектеулер сақталса, әлемнің бірқатар елдерінде отын бағасына қысым күшеюі ықтимал.