800 кітап оқыған оқушы кітап оқуға қалай әдеттенді?

Батырдың кітапқа деген қызығушылығына анасы себеп болған. 8-сыныпта анасы оны жаңадан ашылған кітап дүкеніне апарып, мектеп бағдарламасындағы шығармаларды қарауға кеңес берген. Сол кезде оқушы Міржақып Дулатұлының «Бақытсыз Жамал» және Бердібек Соқпақбаевтың «Менің атым Қожа» шығармаларын сатып алған.

Осыдан кейін кітап оқу оның күнделікті өмірінің бір бөлігіне айналған. Қазір оқушы қазақ әдебиетімен қатар әлем әдебиетін де оқиды. Кітапқа күн сайын бір-екі сағат уақыт бөлуге тырысады.

Жас оқырманның айтуынша, кітапты көп оқу адамның талғамын қалыптастырып, дүниетанымын кеңейтеді. Ол шығарманы таңдағанда авторы мен жанрына назар аударады.

Батыр ерекше ұнататын шығармалардың қатарында Мұқағали Мақатаевтың «Райымбек, Райымбек!» поэмасы, Роза Мұқанованың «Мәңгілік бала бейне», Бердібек Соқпақбаевтың «Өлгендер қайтып келмейді» және Сайын Мұратбековтің «Жабайы алма» туындылары бар. Кейбір шығармаларды бірнеше рет қайта оқиды.

Оқушы үшін кітап оқу тек білім алудың құралы емес, сонымен қатар тұлғалық дамудың бір бөлігіне айналған. Ол алдағы уақытта қазақ әдебиетінен бөлек әлем әдебиетін тереңірек оқуды жоспарлап отыр. Жоспарында Данте Алигьеридің «Құдіретті комедиясы» мен Уильям Шекспирдің пьесаларын оқу бар.

Батырдың кітап оқуына мектептегі ұстаздары да қолдау көрсетеді. Сынып жетекшісі оны түрлі кітап оқу байқаулары мен іс-шараларға қатыстырып, оқыған шығармаларын талқылауға мүмкіндік береді. Мектеп кітапханасында оқушылар арасында кітап бойынша пікір алмасу кездесулері де тұрақты ұйымдастырылады.

Қазақстанда қыркүйек айынан бастап «Кітап оқитын ұлт» республикалық марафоны басталды. Жоба 2027 жылдың наурызына дейін жалғасып, мектеп, колледж, университет, педагогтер, әулеттер, мемлекеттік қызметшілер мен зияткерлерді қамтитын жеті бағыт бойынша өткізіледі. Жобаға қазірдің өзінде 1 миллионнан астам адам тіркелген.