Каспийдегі қайғылы жағдайға байланысты бес әскери қызметші ұсталды

Ұсталғандардың арасында Әскери-теңіз күштері Бас қолбасшысының бірінші орынбасары – штаб бастығы, екі әскери бөлімнің командирі, теңіз жаяу әскерлері ротасының командирі және «Қайсар» катерінің командирі бар.

Олар қызметтік міндеттеріне салғырт қарады және корабль жүргізу талаптарын бұзды деген күдікке ілінді. Аталған әрекеттер ауыр зардаптарға әкелген болуы мүмкін.

Қазір тергеу органдары оқу-жаттығу кезінде қабылданған шешімдерді тексеріп жатыр. Сондай-ақ қауіпсіздік талаптарының орындалуы, ауа райы жағдайының ескерілуі және катердің техникалық жағдайы зерттелуде.

Бұдан бөлек, оқу-жаттығуды ұйымдастыруға жауапты тұлғалардың әрекеті мен әскери қызметшілердің қауіпсіздігін қамтамасыз ету шараларына құқықтық баға берілмек.